Namminersornerullutik Oqartussat kommunillu inissiaataanni attartortittakkani attartortuujunnaarsitsisarneq pillugu Namminersornerullutik Oqartussat nalunaarutaat nr. 4, 7. januar 2002-meersoq.

 

Inissianik attartorneq pillugu inatsisartut peqqussutaanni nr. 5, 31. maj 2001-imeersumi § 56, imm. 3 malillugu aalajangersarneqarput:

 

Attartukkamik attartortuujunnaarsitaaneq

§ 1. Attartortitsisup attartornermik isumaqatigiissut atorunnaarsissavaa ineqarnermut akiliutissaq, kiassarnermut akiliutissaq imaluunniit qularnaveeqqusiissutinut akilersuut akileriigassaagaluaq isumaqatigiissuluunniit malillugu akiliutissaq akileqqullugu allaganngorlugu peqqusissutip tiguneraniit ulluinnaat pingasut qaangiunneranni akilerneqarsimanngippat.
Imm. 2. Attartornerup atorunnaarsinneqarnera pitinnagu pissutsip iluarsineqarnissaanik attartortoq allaganngorlugu peqqusissuteqarfigineqassaaq, tak. § 4.

§ 2. Attartornermik isumaqatigiissut annertuumik sumiginnarneqarpat aammalu pissutsit imm. 2-3-mi taaneqartut attartortumut tutsinneqarpata attartortitsisup attartornermik isumaqatigiissut atorunnaarsissavaa.
Imm. 2. Attartornermik isumaqatigiissut annertuumik sumiginnarneqarsimassaaq attartortup attartortitsisumik isumaqatigiissuteqaqqaarani inissiaq allamut attartortippagu, inissiaq allanut atugassanngortippagu imaluunniit inissiaq piffissaatinnagu qimappagu pissutsillu iluarsineqarnissaanik allaganngorlugu peqqusissutip tiguneqarnerata kinguninngua attartortup pissuseq iluarsiiviginngippagu.
Imm. 3. Attartornermik isumaqatigiissut annertuumik sumiginnarneqarsimassaaq attartortoq inis-siamik paarsinerluppat ajoqusernermillu iluarseeqqusilluni allaganngorlugu peqqusissutip tiguneqarneraniit kingusinnerpaamik ullut 14-it qaangiunneranni iluarsiinngippat imaluunniit najugaqarfimmi torersaarnissamut maleruagassanik unioqqutitsinnginnissaminik allaganngorlugu peqqusissummik tigusaqareersimagaluarluni piffissap sivikitsup ingerlanerani attartortoq "arlaleriarluni" najugaqarfimmi torersaarnissamut maleruagassanik unioqqutitsippat.

§ 3. Attartortitsisup attartortitsineq atorunnaarsissinnaavaa attartortoq pissuseqarpat najugaqarfimmut, attartortitsisumut, taassuma sulisuinut, najugaqarfimmi attartortunut allanut allanulluunniit pisassaqarlutik najugaqarfimmiittunut akornutaarujussuartumik, matumanittaaq:
1) attartortoq inunnut pineqartunut annersaappat taamaaliorniarluniluunniit sioorasaarippat.
2) attartortup pissusia najugaqarfimmut imaluunniit inunnut pineqartunut ulorianaateqarpat, matumanittaaq sakkunik atuinermigut imaluunniit atortussanik ulorianartunik najugaqarfimmiisitsinermigut, imaluunniit
3) attartortoq ima pissusilersorsimappat isumaqarfiginarluni pissutissaqartoq attartortup inissiamiit najugaqarfimmiilluunniit erngerluni peersinneqarnissaa.
Imm. 2. Attartorneq atorunnaarsinneqarsinnaavoq pissusilersornerit imm. 1-imi taaneqartut at-tartortumit namminermit, attartortumut inoqutaasunit allanilluunniit attartukkamiinnissaannik attartortup akuerisimasaanit pissusilersornerunersut apeqqutaatinnagu.

 

Allaganngorlugu peqqusissut

§ 4. Allaganngorlugu peqqusissut nalunaarutigineqassaaq pissutsip attartortumut tutsinneqarsinnaasup aaqqinneqarnissaanut attartortoq naammaginartumik piffissalerlugu.
Imm. 2. Allaganngorlugu peqqusissutip imarissavai makku pillugit paasissutissat
1) pissutsit peqqusissuteqarnermut pissutaasut,
2) inissianik attartorneq pillugu inatsisartut peqqussutaanni aalajangersagaq attartornermik isumaqatigiissutip atorunnaarsinneqarsinnaaneranut tunngavissamik imaqartoq,
3) attartornermik isumaqatigiissut atorunnaarsinneqassasoq peqqusissut piffissap peqqusissummi piffissaliunneqartup nallinnginnerani malinneqanngippat, aamma
4) atorunnaarsitsinermut atatillugu attartugaq erngerluni qimanneqassasoq.
Imm. 3. § 1, imm.1, § 2, imm. 2 aamma 3 aammalu § 7, imm. 3 naapertorlugit allaganngorlugu peqqusissutit attartortumut nassiunneqassapput allakkatut tammarnaviikkatut imaluunniit inissiap sumiiffianut allakkisartukkoorlugit tunniunneqassapput.

 

Attartornermik isumaqatigiissutinik atorunnaarsitsineq

§ 5. Allaganngorlugu peqqusissut piffissaliussap, tak. §§ 1, 2 aamma 7, nallinnginnerani malinneqanngippat attartortitsisup attartornermik isumaqatigiissut utaqqisitsinani atorunnaarsissavaa.
Imm. 2. Atorunnaarsitsineq allaganngorlugu attartortumut nalunaarutigineqassaaq. Nalunaarutip paasissutissat allaganngorlugu peqqusissummi § 3-mi taaneqartumi atuarneqarsinnaasut saniatigut imarissavai atorunnaarsitsinerup kingunerisassai pillugit paasissutissat, matumanittaaq
1) inissiaq qaqugu qimanneqareersimassasoq pequtinillu imaarneqareersimassasoq,
2) attartukkamut matuersaatit attartortitsisumut qaqugu tunniunneqareersimassasut,
3) inissiamik takusaaneq qaqugu pissanersoq,
4) piffissamut sumut ineqarnermut, kiassarnermut il.il. akiliutissat akilerneqassanersut aamma
5) aningaasartuutit allat suut attartortup attartortitsisumut taarsiissutigissanerai, assersuutigalugu annaasanut paarsinerlunnermik pissuteqartunut, attartortitsinerup kinguartinneranut taamaaqataanulluunniit akissaajaatinut.
Imm. 3. Attartukkap attartorteqqinneqarnissaa attartortitsisup anguniassavaa. Piffissamut attartortup ineqarnermut akiliutissanut pisussaaffeqarnerani attartortitseqqinnikkut ineqarnermut akiliutitigut attartortitsisup pissarsiai pissarsiarisimasassaraluiluunniit attartortumut piumasaqaatinit, tak. imm. 2, nr. 4 aamma 5, ilanngaatigineqassapput.
Imm. 4. Attartornermik isumaqatigiissut attartortitsisup atorunnaarsissimappagu, tak. imm. 1, attartorneq atorunnaarsinneqartoq kingusinnerusukkut atuuteqqilersinneqarsinnaanngilaq.

 

Atortuulersitsineq ikaarsaariarnermilu aalajangersakkat

§ 6. Nalunaarut ulloq 1. februar 2002 atortuulerpoq.
Imm. 2. Peqatigitillugu Namminersornerullutik Oqartussat kommunillu inissiaataannit attartortittakkanit anitsitsisarneq pillugu Namminersornerullutik Oqartussat nalunaarutaat nr. 60, 29. december 1994-imeersoq atorunnaarsinneqarpoq.

§ 7. Ineqarnermut akiliutissanut, kiassarnermut akiliutissanut imaluunniit qularnaveeqqusiissutinut akilersuutinut isumaqatigiissulluunniit malillugu akiliutissanut ulloq 1. januar 2002 sioqqullugu akilerneqareersimasussanut attartortitsisup piumasaqaatai nalunaarut manna malillugu attartornermik atorunnaarsitsinissamut tunngavissaasinnaanngillat, taamaattoq tak. imm. 2 aamma 3.
Imm. 2. Attartortitsisup attartortoq kajumissaassavaa akiligassat imm. 1-imi taaneqartut akilerneqarnissaannik isumaqatigiissusioqqullugu. Attartortoq taamaaliornissaminut attartortitsisumit allaganngorlugu kajumissaarneqareernermi kingorna kingusinnerpaamik qaammatit 2 qaangiunneranni akiliinissamik isumaqatigiissusiorsimanngippat nalunaarummi matumani maleruagassat malillugit attartorneq attartortitsisup atorunnaarsissinnaavaa.
Imm. 3. Akiligassat imm. 1-imi taaneqartut akilerneqarnissaannik isumaqatigiissusiaareersimasumik attartortoq sumiginnaappat nalunaarummi matumani maleruagassat malillugit attartorneq attartortitsisup atorunnaarsissavaa. Akiliinissamik isumaqatigiissut sumiginnarneqarsimassaaq akileeqqusilluni allaganngorlugu peqqusissutip tiguneqarneraniit kingusinnerpaamik ulluinnaat pingasut qaangiunneranni akilersuutit akilerneqareersimasussaagaluit akilerneqarsimanngippata.

Namminersornerullutik Oqartussat, ulloq 7. januar 2002

Jørgen Wæver Johansen

/

Jens K. Lyberth